في حاجة فيك اتغيرت
شكلك
ملامحك
توكة حزامك ع البلوزه
و البلوزه مكرمشه
كلّك روايح منعشه

مع إنك
سبتي برفانك
على البنوار حزين

مبقاش مهم

مكياجك المبهج
شعرك المفرود حرير سوري
معجون سنانك عند ما بتصحي

سنانك اللولي
حَلَقك
أساورك
مرايه
و المناديل

في حاجه فيك اتغيرت

كل المهم
اصبح عديم الروح ممل
مبقاش يهم الشكل و التفاصيل

المهم

نلحق ميعادنا كل يوم الصبح
قعدتنا كتف ف كتف
على رصيف سقعان
إيدك ف إيدي
و الشجر نعسان
و الروح بتطرح ورد
يشبهك ف الشوف
ماعدش شيء مألوف
ما عدش غير
إيدك في إيدي
و الرصيف
و النص ساعه
قبل المحاضرة ما تبتدي