محمود جمعة يكتب / حاوى
- شعر
- 01 أبريل 2016
- d M Y
- 3113 مشاهدة
في الحلقه حاوي
و الغناوي لمت المقاطيع
و غزيه و الكل غاوي
و الميدان بيسيع
القرد أصل الحكايه
و الحواه جرابيع
شايلين فى جوف الجراب
جزره و عصايا
و كوبيات للبيع
و القرد قاعد يطبل
علي الرق و صاجاته
و الحاوي من تحت باطه
خرج التعابين
يا قرد أيه أجبرك
فى حلقة الحاوي
تعجن كفلاحه
و تنام كما العازب
و تغني بأباحه
و انت اللي بتحاسب
ع الغله بالسحتوت
الحلقه توسع عليك
تشقي في لم النقوط
و فى أخر السهره
الحاوي يقفل عليك
الحاره و الزنازين
يا قرد يا ميمون
ثبت عليك الجنون
أوعا تقوللي بريء
أنت اللي يوم ما صحيت
على غيار الريق
أمنت بالحاوي
يبني لك المحرقه
و انت اللي بتناوله
من العلبه عود كبريت
و تقوللي ده مخاوي
ملايكه أو شياطين
