محمود جمعة يكتب : كشكول محاضرات
- أدب
- 25 سبتمبر 2016
- d M Y
- 2967 مشاهدة
جدول محاضرات النهارده
مفيهوش محاسبه
الكل فى مدرج تلاته
و انتِ غايبه
بصيت لكشكولك معايا
وانزويت انا غصب عني
فتحته بالراحة بتأني
خطك النونو الملوّن
الاستكر ف كل صفحه
صفحة نجمه
صفحة سهم
صفحة قلب بيتقسم
صفحة قلب بيبتسم
صفحة فيها كلمتين
اسمي و اسمك
فرسمت بينهم قلب اخضر
أوله ف صدري
و اخره راشق جوه قلبك
خلص الكلام
و انا سبت كشكولك موارب
و احنا فى السكه
لما سألني صاحبي
عن درس النهارده
قلت له:
أنا كنت غايب
