اربط حزام الامان
و رجاء كمان
وضع المقاعد فى اعتدالها
المواجه للأفق
الوضع مش سيئ اوى
لكن لابد تكون حذر
حبة مطبات م الهوا
على عطل فى محرك صغير
فى يسار الطائرة
جارى اصلاحه بأمان
و مافيش سبب للإنزعاج
الرحلة سهلة و المسافة المعلنة
مالهاش نهاية حسب تعاقد
تم للراكبة الوحيدة
عند قطع التذكرة
انا اصلى عارف حضرتك
نفسك عنيك طول الحياة
ماتشوفش حاجة الا السما
فرحان اوى بشعورك اللى مصورك
كائن جميل له اجنحة
عايش فى دنيا خلقتها
برة الزمن
ــــــــــــ
حاسس بخوفك من غيوم
كل ما تلوح فى الفضا
القاك حزين
خايف يغيب لون السما عن بسمتك
مفزوع تشوف من تانى اسفلت المطار
ــــــــــــــ
اعلن رسالة مسجلة
فيها اشارة للى ساكنة رحلتك
ان الهبوط دة لو حصل
يكون لأول مرة فى تاريخ السما
هبوط بناءَ على رجاء المشترك
