اضطرت طالبة فى كلية الحقوق جامعة الزقازيق آن تترك  لجنة الأمتحان فى نصف الوقت المخصص لها بسبب آلم ظهرها الغير محتمل بسبب حادث تعرضت له من حوالى 6 سنوات نتج عنه كشر فى الظهر وشلل نصفى وقد خضعت الطالبة ل6 عمليات خلايا جزعية وفشلت جميعها  ورغم حصولها على موافقة للعلاج على نفقة القوات المسلحة الآ انها حتى الآن لم تنفذ  والحل الوحيد لكى تقف على قدميها متوقف على الموافقة على سفرها  الى ألمانيا لأجراء عملية زرع خلايا جزعية

ودى الرسالة اللى كتبتها  الطالبة سناء على صفحتها الشخصية …

الموضوع أنا عندى 25 سنة ومازلت طالبة بكلية الحقوق جامعة الزقازيق فرقة تالتة وده بسبب إن من خمس سنين من 2011 حصلتلى حادثة عربية بسبب تهور السواق وكبوت العربية كسرلى ضهرى وعملى نزيف ف الرئة واترميت ع الطريق طبعا وطبعا علشان الإسعاف مبتنجدش حد ف روحت المستشفى ف عربية نص نقل وانا قاعدة وحالتى بين الحياة والموت وضهرى مكسووور دخلت مستشفى ديرب نجم قالو ملناش حل فيها وكل ده انا لوحدى محدش معايا من أهلى اتحولت على جامعة الزقازيق خيطولى الجروح السطحية من غير عمل اى إشاعة واترميت ف عنبر وانا كل مكان بينزف دم حتى من بوئى وفضلت من يوم الأربع ليوم الجمعة من غير اهتمام ولا إشاعات والله العظيم ولا حتى دكتور غير دكتور امتياز قال خرجوها اى مكان تانى البنت هتموت ودخلت صيدناوى الزقازيق عملت اول عملية يوم 3/1 والتانية يوم 16/1 عبارة عن تثبيت فقرات واتفاجأت بعد 35 يوم وانا لسه ف المستشفى إن حصلى قطع بالحبل الشوكى أدى لشلل نصفى ولا إحساس ولا حركة الحمد لله ده طبعا بسبب انى اتنقلت غلط والرمية اللى السواق رمهالى ع الأرض وسابنى ومشى اللى هو ف نظر القانون كان عيل ومتحاكمش علشان قاااااصر ومن يومها اتمرمط واتبهدلت وعملت 6 عمليات حقن خلايا جزعية وفشلت ودكاترة كتيرة اوى ومعروفين جدآ كنت بالنسبة ليهم فار تجارب ولحد دلوقتى محدش معبرنى بعت ورقى للناس كلها محدش استجاب ولا محافظة ولا وزارة واليوم اللى استنيته اخد موافقة انى اتعالج على نفقة القوات المسلحة روحت لمستشفى الجلاء قالولي فيه دكتور ألمانى هنعرضك عليه ومتعرضتش ادانى جواب انى اتحول لمستشفى العجوزة لمدة علاج طبيعى مكثف 6 شهور ولما روحت قالولي مفيش المبلغ كبير والدولة واقعة دلوقتى الكلام ده من سنة قولت طيب معايا جواب للعلاج الطبيعي هنا 6 شهور لحد ما أسافر قالولي دى مستشفى عسكرى وانتى مدنية مينفعش طيب يا جماعة مانا واخدة جواب برضو من مستشفى الجلاء والله أهو وهيا عسكرى برضو قالو مينفعش وسيادة العميد قالى حاولى تعيشى حياتك  شكرآ سيادة العميد  المهم الموضووووووع كبير ومسيبتش مسؤل والله العظيم إلا أما روحتله تليفزيون واتكلمت جوابات وبعت اتمرمطناا بمعنى الكلمة أنا واهلى واتهانا كتير ولا اللى بنشحت وخلاص مبقاش معانا حاجة أنا اللى بطلبه  حقى علاجى انى أسافرالمانيا عمل عملية زرع خلايا جزعية علشان أقف على رجلى من تانى أنا تعبت و مش مهم مين يسفرنى المهم اتعالج
آسفة بس لازم تساعدوني مش عاوزة غير حقى اللى ضاع من كل جهة